أسئلة شائعة في مجال الهندسة المدنية

 

 


ايه الفرق بين المهندس والمقاول؟

واية الفرق بين المهندس المدني والمعماري ؟

واية علاقة المهندس المدني بالرمل والزلط ؟

ويعني اية هندسة أصلا .. وايه طبيعة عمل المهندس ؟

 

بالرغم من ان الاحتياج الشديد للهندسة بدأ منذ خلق الانسان الأول , وبالرغم من ان الهندسة هي العامل الرئيسي في بناء الحضارات وهي المقياس الأساسي اللي بنقيس بيه تقدم الدول

وبالرغم من ان الهندسة هي المحور الأساسي اللي بتدور حوليه كل حاجة في حياتنا لأن أي حاجة في حياة الانسان بتحتاج للهندسة بما في ذلك الجهاز اللي انت بتقرا عليه البوست دة , والمكان اللي انت قاعد فيه دلوقت ) )

حتي نظام الكون كله ماشي علي أسس هندسية …

حتي معظم الديانات والأنبياء الهندسة بتشكل جزء حيوي جدا منها زي بناء الكعبة وانشاء السفينة وحفر الخندق …

وكمان أي محاولة لتطوير أي مجال في أي دولة متوقف تماما علي تطوير الهندسة في الدولة دي (بما في ذلك الاصلاحات الاجتماعية والاقتصادية والصناعة والتصدير , والمجالات الطبية والاعلامية و غيره

ومع ذلك لغاية النهاردة معظم الناس ماتعرفش بالظبط هي اية طبيعة عمل المهندس !

————

اية الفرق بين المهندس والمقاول ؟

طبعا بغض النظر عن مرحلة الديزاين (لأن دي معروف ان اللي بيعمل الديزاين هو المهندس) , ندخل بقي علي طول في التنفيذ

تخيل معايا ان عندنا مشروع عبارة عن حيطة واحدة طولها متر واحد بس وارتفاعها متر واحد .. المشروع العظيم دة هيتنفذ ازاي ؟

المهندس ممكن نلخص دوره في 4 حاجات : الناحية الفنية والعلمي , الناحية الادارية , الناحية الاشرافية , الناحية الاستثمارية

المهندس هيبدأ يعمل الدراسات اللازمة لتنفيذ المشروع حسب المتغيرات المتاحة , وهيبدأ يخطط لعمليات التنفيذ المختلفة , وهيختار بين البدائل المختلفة للتنفيذ زي مثلا نوع الماتريال المستخدمة

وعمل الاختبارات الفنية عليها اللي هتضمن سلامة المبني زي مثلا اختبارات التربة وغيره , وشغل المكتب الفني , وتحديد النظام الانشائي اللي هيتنفذ وتكلفته وزمن تنفيذه

المهندس مسؤل عن ادارة المشروع بما في ذلك (ادارة الموارد البشرية , التحكم في التكلفة , البرنامج الزمني , …..)

وكمان المهندس مسؤل عن متابعة التنفيذ للتأكد ان كل حاجة ماشية للخطة اللي هو عاملها (عن طريق المشرفين )

الناحية الاستثمارية ممكن نلخصها في دراسة العطاءات والمناقصات والتعاقد وغيره (المقاول الرئيسي بيشارك فيها)

المهندس مسؤل عن ادارة الأزمات وأسلوب حل المشكلات

طب دلوقت خططنا للمشروع وجهزنا الدراسات اللازمة , وقررنا طريقة التنفيذ والنظام الانشائي والمواد اللي هتستخدم وعملنا الاختبارات المطلوبة , وجهزنا المخططات .. عاوزين بقي ننفذ الكلام دة .. نعمل إيه !؟

علشان ننفذ دة هنحتاج لمعدات وعمال وعدة .. هنا بييجي دور “المقاول”

المقاول مسئول عن توفير العناصر اللي هنستخدمها لتنفيذ المخططات اللي المهندس بيعملها

 

يعني بإختصار المنظومة عندنا بتحتاج لخمس أفراد :

1 – المهندس , ودة المسؤل عن الادارة والتخطيط والاشراف

2 – المقاول , ودة مسؤل عن التنفيذ الفعلي بناء علي مخططات المهندس , وتوفير العناصر المطلوبة للتنفيذ

3 – المورد , ودة المسؤل عن توفير المواد اللازمة لاتمام المشروع

4 – المشرفين , ودورهم متابعة سير العمل وتوزيع العمال علي العمل , ويعتبروا حلقة الوصل بين المهندسين والعمال

5 – العمال والفنيين

يعني نقدر نقول ان المهندس دوره فني واداري , والمقاول دوره لوجيستيكي , والمورد دوره تجاري , والمشرفين دورهم تنفيذي

في الوقت اللي المقاول بيهتم جدا بتقليل التكلفة (علي حساب الجودة) علشان يحقق أكبر أرباح ممكنة , والمالك بيهتم بجودة المنتج النهائي (علي حساب أرباح المقاول) .. المهندس بيعمل توازن بين التكلفة والجودة والوقت , وبالتالي تحقيق أقصي جودة ممكنة بأقل تكلفة ممكنة

 

 

واية الفرق بين المهندس المدني والمعماري؟

المهندس المدني هو المسؤل عن تصميم وتنفيذ المشروع نفسه (وليكن مبني مثلا) , أما المعماري مسؤل عن تحسين استخدام المبني زي مثلا استغلال المساحات بشكل أفضل , الاهتمام بالفتحات والتهوية ودخول الشمس , تصميم شكل أفضل للواجهة (ودة اسمه التصميم المعماري)

المهندس المدني بيعمل التصميم الانشائي , والمهندس المعماري بيعمل التصميم المعماري ,, والمهندس المدني بينفذهم الاتنين

في العصور السابقة كان يطلق علي المهندس المدني كلمة مهندس معماري أو مهندس مدني .. لأن وقتها ماكنش فيه مهندس معماري أصلا .. كان المهندس المدني وهو بيعمل التصميم الانشائي بياخد باله من الاحتياجات المعمارية للمبني (اللي هي تسهيل استخدام المبني) .. لكن مع تعقيد تصميم المباني ظهرت الحاجة لشخص متخصص أكتر في الحاجات المعمارية فقط بدون الدخول في التفاصيل الانشائية

كلمة مهندس مدني أوسع من كلمة مهندس معماري (اللي هي برضو كانت بتتقال علي المدني) لأنها تشمل جميع المجالات اللي بتغطي حاجة المجتمع المدني , وبأت كلمة معماري متخصصة أكتر في الديزاين المعماري

 

واية علاقة المهندس المدني بالرمل والزلط ؟

الرمل والزلط جزء من مكونات الخرسانة اللي هي احدي المواد الخام اللي بنحتاجها لتنفيذ المشروع , وزي ماعرفنا خلاص ان مسؤلية المورد (Supplier) انه ينقلها للموقع (تجاريا) , ومسؤلية

المقاول هو تنفيذ عملية صب الخرسانة عن طريق العمال , والمشرفين مسؤلين عن تنظيم ومتابعة العمال علشان ينفذوا العمل دة بالطريقة اللي المهندس بيحددهالهم

المهندس دوره ادارة العمليات دي كلها , ومتابعة التنفيذ , والتأكد ان التنفيذ تم حسب التخطيط اللي هو عامله , والتأكد انه حقق التكلفة والوقت والجودة المطلوبة

 

يعني اية هندسة أصلا .. واية طبيعة عمل المهندس؟

بعيد عن مهنة الهندسة , فالهندسة في حد ذاتها بتمثل اسلوب الشخص (أو المجموعة) في التفكير والادارة وأسلوب التعامل مع المشكلات , يعني ممكن أي شخص يكون مهندس في مجاله

مصطلح مهندس نحب نقوله للشخص اللي بيفكر باسلوب هندسي حتي لو مش خريج كلية الهندسة …

ممكن نلخص الأسلوب الهندسي في النقاط التالية :

*اسلوب الادارة والقيادة

*اسلوب التعامل مع المشكلات , يوجد 3 مستويات احترافية للتعامل مع المشكلات

*الدقة المتناهية في تحديد الأمور

*القدرة علي التخيل والتعامل مع أمور لسة مش موجودة علي الطبيعة

*القدرة علي الابداع والابتكار

*القدرة علي اتخاذ قرارات مصيرية في أقل وقت ممكن

*الحصول علي المعلومة كاملة بكافة تفاصسلها

*الاهتمام بالتفاصيل الصغيرة

*القدرة علي متابعة التطور والتكنولوجيا الحديثة

 

 

 

 

 

Tags:

You may also like...

0 thoughts on “ أسئلة شائعة في مجال الهندسة المدنية”

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *