“Interview with : “Handaz

السلام عليكم 

في الأول بنحب نرحب بضيفنا المهندس/ محمود شريف ” CEO &Co-Founder of ” Handaz

فى البداية عايزين نعرف ايه هو Handaz ؟

الفكرة بدأت باننا لاحظنا مشكلة، وهي ان مهندسين المدني والعمارة في مصر أغلبهم بعاد عن استخدام البرمجة وغير مواكبين لأحدث التطورات في مجال التكنولوجيا اللي ممكن توفر عليهم شغل ووقت ومجهود كبير.

احنا في Handaz مجموعة من مهندسين مدنى ومعماريين و Software Developers هدفنا إننا نقدم للمهندسين حلول تساعدهم في المجالات الهندسية المختلفة وتخلي الكمبيوتر هو اللي يقوم بالعمليات المكررة أو اللي محتاجة مجهود كبير عن طريق برامج وإضافات “Addins” تساعدهم في إنجاز شغلهم بأقل وقت وبأقل خطأ.

ايه العلاقة بين المهندس المدنى أو المعماري و البرمجة ؟ مش شايفها بعيدة شوية؟

بص… حاليا البرمجة داخلة في كل المجالات تقريبا وأتوقع ان الأجيال اللي جاية هتلاقيهم زي ما بيتكلموا عربي أو انجليزي هيتكلموا برمجة. الفكرة في ان الكمبيوتر غبي لكن سريع جدا ومابيغلطش ومابيتعبش. لو انا جيبت مهندس واديته مسألة خدت منه ربع ساعة وحلها صح وبعد ما خلص روحت مديله مسألة تانية وتالتة ورابعة… وألف، تفتكر المهندس ده هيحصله ايه؟ أولا بعد تالت أو رابع مسألة هيبتدي يفقد تركيزه ويغلط… ثانيا هيزهأ وهيحس انه مابيعملش حاجة مفيدة لان الانسان بطبعه كائن مبدع ما بيحبش يكرر ثالثا الألف مسألة هياخده منه أكتر من شهر وبعد الشهر هيطلب منه ألف مسألة تانية وهكذا لحد ما ينتحر أو تجيله جلطة… طب لو المهندس ده بيفهم في البرمجة ممكن يعمل ايه ؟
ببساطة هيقعد يعمل برنامج بيحل المسائل دي عن طريق انه يدخله مدخلات ويطلب من البرنامج الحل وطبعا الكلام ممكن ياخد ساعة شغل وممكن ياخد أسابيع أو أشهر… على حسب تعقيد المسائل. لكن في الاخر بقى معاك برنامج يحللك الألف مسألة في ثواني من غير اي أخطاء ومن غير ما تزهأ.
طيب تخيل انك صاحب شركة وبتدفع مرتبات للموظفين وعندك مشاريع بتاخد اكتر من خمس شهور شغل وواحد جيه قالك انا عندي طريقة تخلي المشروع ياخد منك شهر بدل خمسة… يعني لو افترضنا ان المشروع شغال عليه خمس مهندسين وكل واحد مرتبه 5000 جنيه… يعني هتوفر 100000 جنيه في المشروع مرتبات موظفين بس… هتعمل ايه ؟

حلو اوي الكلام ده … طب ممكن أمثلة  للبرامج اللي بتقدموها ؟

إحنا بنقدم خدمات للمكاتب أو الشركات أو الأفراد اللي في مجال الهندسة المعمارية والانشائية على حسب شغلهم واحتياجهم وبنقدم كمان برامج عامة تفيد أي مهندس أو مكتب…وأول برنامج هكلمك عنه هو  Handaz Cad2Bim “

فكرته جت من مشكلة قابلتنى شخصياً وأنا بشتغل في شركة من الشركات وهى إن كان فيه رسومات بتيجى معمولة بالـ AutoCAD والمطلوب ندخّلها في برنامج الـ Revit ونعمل لها BIM Model  وده كان بيحتاج وقت كبير ومجموعة من المهندسين عشان نعمل جزء صغير من المبنى وكان شغل مرهق وبيطلّع عنينا وكمان بيطلع فيه أخطاء كتير.

ومن هنا جت فكرة  Handaz Cad2Bim “ قدرنا نعمل برنامج بياخد لوح الـCAD  ويستخدم خوارزميات بتفهم اللوح وبتحاكي عملية بناء الـBIM Model  اللي المهندس بيعملها، وبينتج ملف IFC متوافق مع كل برامج الـBIM  بما فيهم طبعا برنامج الـ Revit. وبكده نكون وفرنا شغل أسابيع في دقائق.

وامتى البرنامج نقدر نستخدمه ؟

في خلال شهور قليلة جداً إن شاء الله تقدر تستخدمه من على موقعنا www.handaz.com  وممكن كمان تتابع صفحتنا على الفيسبوك fb.com/handazTech

handz3

طيب في برامج تانية نفذتوها ليها علاقة بالتصميم المعماري ؟

ايوه احنا شغالين على برنامج Handaz Conceptual Design “ وده برنامج جت فكرته من ان الطريقة المعتادة في التصميم المعماري بتاخد وقت ومجهود وبتكلف فلوس كتير. والمهندس المعماري محتاج برنامج يسرع عملية التصميم ويوفر في الوقت وفي التكلفة وبالتالي يسد الفجوة اللي بين المعماريين ونسبة كبيرة من الـ landowners اللي بيهربوا من المعماريين عشان أسعارهم العالية. بطريقة سهلة يقدر المهندس يدخّل معلومات أساسية عن المبنى السكنى المطلوب زي حدود الارض واتجاه الشمال والشوارع المحيطة وبعد عملية مبنية على الذكاء الاصطناعي بتطلع تصميمات معمارية مختلفة على المقاييس الصحيحة تقدر تساعد المعماري في اتخاذ القرار .

وبكده نكون وفرنا شغل أيام في دقائق…. وعلى فكرة البرنامج ده لسه تحت قيد التطوير

وايه الجديد اللي ممكن تضيفوه في التصميم الإنشائي ؟

احنا برضه شغالين على برنامج ” Handaz Steel “ وده ببساطة بيقدر يعمل تحليل إنشائي وتصميم ورسم مباني حديدية سابقة الهندسة PEB في خطوات قليلة بالكود المصري والأمريكي وباستخدام الـ API الخاصة ببرامج الـSAP, STAAD & Robot ويقدر يوفر البرنامج أيام على المصمم الإنشائي

88

وهل عندكم ثقة في ان تجربتكم هتنجح ؟

احنا الحمد لله في الفترة الأخيرة أفكارنا وشغلنا حصلوا على جائزتين الجائزة الأولى كانت المركز الأول في مجال الهندسة المدنية والمعمارية في يوم الهندسة المصري 2016

والجائزة الثانية كانت المركز الثاني من جامعة Waterloo في كندا في مسابقة الابتكار Jamii
ودي حاجة بتديلنا دفعة قوية وثقة في اننا ماشيين على الطريق الصح وقادرين نحقق رؤيتنا بإذن الله

وفى النهاية تحب تنصح المهندسين انهم يدخلوا المجال ده ؟

أحب أقول لهم ان المجال ده ليه مستقبل كبير جداً ودي فرصة كويسة ان المهندسين يدخلوا فيه وخصوصاً مجالات الـ BIM والـ Informatics.

 

 

 

Tags:

You may also like...

0 thoughts on ““Interview with : “Handaz”

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *