ادارة الموارد البشرية

 ادارة الموارد البشرية

Human Resource Management

 

الجزء التانى و فيه ان شاء الله هشرح مجموعة مصطلحات و حاجات لازم تبقى فاهمها او عارف معناها فى جزئية ادارة الموارد البشرية .

 Halo Effect : 

أو نظرية الهالة ” اللى بتبقى حوالين القمر” …كمدير ناجح ..لازم تبقى عينك مش بتتأثر بأى هالة من النجاح حوالين فرد فى فريقك …يعنى اييييه ؟؟ يعنى مثلا لو عندك مهندس صغير فى السن و الواد دا عبقرى فى استلام الخرسانات مثلا …مش بالضرورة انه عشان عبقرى فىنقطة فنية يبقى تمسكه مدير ادارة التنفيذ مثلا لأنه ببساطة ممكن يفشل فشل زريع ….و دى غلطتك مش غلطته …. انت الهالة اللى حواليه خلتك متاخدش بالك من الموضوع دا و بالتالى الولد او المهندس دا فشل فى المنصب الجديد .نظرتك فى الموضوع دا محتاجة حس هندسى و خبرة كبيرة اوى فى افراد فريقك .

(360 degree Review ):

دا بقى نوع من انواع ال Project performance appraisals

اى مشروع بيبقى فيه تقييمات للاداء …اداء الناس اللى عندك….عمال و اللى بيقيمهم المراقبيين …و المراقبيين و اللى بيقييمهم المهندسين ..

النوع دا بقى جامد ” و مش بيطبق عندنا كعرب للأسف ” من الأخركدا …معناه ان زى ما المراقب بيقيم العامل اللى تحته و المهندس بيقيم المراقب اللى تحته …فالدايرة بتلف يا معلم على الكل …يعنى العامل من حقه يقيمك انت كمهندس و انا كمراقب او مهندس من حقى برضه اكتب تقييمى لمدير المشروع عندى او المراقب يقيم المهندس بتاعه !!! أكيد فهمتو ليه مش بيطبق عندنا

(Successful manager and “ Observation & Conversation “ )

لما هنتكلم ان شاءا لله على ادارة الاتصالات فى المشروع Communication Management

و نعرف ان من المعروف ان المدير بيقضى حوالى 90 % من وقته فى الاتصالات ” ادارة الاتصالات بين فريقه و كل من له علاقة بالمشروع “

مش بقصد بكدا الموبايلات و بس …لا ايميلات و تقارير و خطابات بيبعتها و يرد عليها و تقارير دورية مطلوبة منه و تعميمات و اتصالات تليفونية و اجتماعات و الخ الخ .

هنا بقى بيقوللك انك لازم تخلى بالك ان مش دورك بس انك تقعد تستلم تقارير و تشوف ايه الخلل فيها و تبعت عليها ردود و بس ” يعنى من الأخر المقصود بالمعنى انك لازم برضه تلاحظ و تنزل مرة كدا تمر فى الموقع و تسأل المهندس عملت ايه فى دى و طيب دى خلصتها ….تتصل بالتليفون و تسأل مهندس عن شىء ….يعنى تلاحظ و تحاور فريقك …دا بيخلق نوع من الثقة والتحفيز و يمكن تطلع بمشاكل او ملاحظات مفيدة تفيدك فى مشروعك او فى ادارة فريقك نفسه مش مشروعك بس .

( Compromise & Confronting )

لما بتقابلك Conflict
فى مشروعك او مشكلة او ازمة بين حد فى فريقك مع التانى ” اتنين اختلفو مع بعض فى مشكلة مثلا او رأى )..فى اساليب كتير ليك كمدير انك تحل الأزمة دى ..هنتكلم عن اشهر اتنين منهم و هما دول Compromise
و دا بيطلق عليه ( lose – lose technique )

معناها بالبلدى كدا …سيب و انا سيب …أو هو يسيب و التانى يسيب برضه …تنازل …مقايضة ..هات و خد يعنى ..تسوية …حل وسط .

يعنى بتحاول ترضى الاتنين رضاء مش كلى بان كل واحد يسيب حاجة أو يتغاضى عن شىء و يوصلو لحل وسط يرضى الطرفين .

( Confronting )

و بيطلق عليه برضه Problem Solving

و من اسمه معناه المواجهة او حل المشكلة من جذورها …يعنى بتواجه اصل المشكلة و تحاول تحلها عشان متتكررش حتى بعد كدا و دا من افضل اساليب حل الازمات طبعا .

( Expectancy Theory )

و دى بالبلدى كدا معناها ان فريقك او اى حد فى فريقك متوقع انه لو اشتغل كويس بيلاقى مكافأة ..هتلاقيه دائم التحفز و أداؤه مرتفع دايما ..يعنى طول ما هو متوقع او منتظر زيادة او بونص هتلاقيه شغال مية مية معاك ” طبعا محتاجة مدير ذكى ميطمعش الناس فيه او يعتبروه حق من حقوقهم انه لازم ياخد بونص عن اى شىء بيعمله و اللى هو اصلا من صميم عمله و بياخد عليه مرتب …بس حبيت برضه اعرفك معنى مصطلح ممكن يقابلك .

( Fringe benefits & Perks )

بالنسبة لل Fringe benefits
دى بتبقى زى مكافأت او منح لكل العاملين بالشركة …نسبة من ربح الشركة كل سنة مثلا …نظام تأمين صحى شامل …كدا
اما بالنسبة لل Perks

دى بتبقى حاجة من المدير لبعض الناس المجتهدين … مدير يديك مكافأة مالية مثلا …يديك مكتب خاص ..يديك موقف لعربيتك مخصوص .المهم يعنى حاجة خاصة بناس معينة نتيجة لمجهوداتهم و مش للكل .

و أخيرا … جميع الأديان السماوية بتحث على احترام الانسان و اعطاؤه حقه و العدل بين الناس.

و تذكر دائما …” إذا كنت قائماً بحمل أمانة فأنت مؤتمن على أمانتك ، مديراً كنت أو وزيراً أو رئيساً ، وتذكر أن من ترعاهم أحراراً ، فلا تستعبدهم بنفوذك وسلطتك فتذلّ في الدنيا قبل الآخرة ” .

و هكذا ننتهى من موضوع ادارة الموارد البشرية …شكرا

 

ادارة المشروعات و المدير الناجح ( 5)
مشاركة م : محمد فريد بركات

السابق : فن ادارة البشر

Tags:

You may also like...

3 thoughts on “ادارة الموارد البشرية”

  1. يقول Ramez Fakhry:

    لو سمحت عايز معدلات انتاج العمالة في اعمال التشطيبات

  2. يقول م عبدالخالق:

    جميل جدا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *