ادارة الموارد البشرية

ادارة الموارد البشرية

Human Resource Management

فن ادارة البشر

 

فى البداية لازم نفهم ان مش شرط حصولك على فريق عمل ماهر و كويس …انك كدا عملت ادارة موارد بشرية صح … الفن و الادارة الحقيقية انك تحصل على شخص معين ” مش بالضرورة ماهر جدا ” بس ينفع للمكان اللى هيتحط فيه …و مش كدا بس …الحرفنة بقى انك ازاى تحافظ على روح الفريق و تديرهم صح و تبقى عارف تعمل لهم تحفيز مستمر خلال العمل فى المشروع .
بصفتك مدير ناجح …لازم تبتدى تجهز نفسك من بداية المشروع بخطة ادارة الموارد البشرية اللى هتكون عندك فى مشروعك ..هتجيب مين .؟؟؟ و منين ؟! من فرع تانى لشركتك وبالتالى فى مفاوضات مع مدراء الفروع دى ؟ من برة الشركة و مقابلات و المؤهلات و الخبرات اللى هتكون مطلوبة ؟؟ من برة مصر خالص و تبتدى تخطط ازاى هتعملو جروب و فريق عمل و هما شغالين من برة مصر و دا بنسميه Virtual Team

طيب لما اجيبهم …كل واحد هيبتدى شغله امتى ؟؟ أو انا المفروض اجيبه امتى فى المشروع ياترى هجيبه من اول المشروع و اسيبه يقعد ياكل أيس كريم لأن شغله المطلوب منه لسه فى أخر مراحل المشروع ؟؟؟

الناس اللى هجيبها دى مفروض امشيهم امتى ؟؟؟ و لا اسيبهم بعد ما يخلصو شغلهم و تتحمل تكاليفهم بدون فائدة على المشروع …قبل ما امضى معاهم عقد مثلا بسنتين و انا مش محتاجهم الا سنة !!

تدريبهم …الناس دى يا ترى هل محتاجة كورسات فى شىء معين عشان مشروعى ؟؟؟

نظام المكافأت اللى هيتحط فى المشروع ( دا مهم جدا فى اى مشروع و له فوائد و أخطار هنقولها بعدين ) و يا ترى هتكون ايه المكافات …فلوس ؟؟؟ هدايا رمزية ؟؟؟ ترقيات ..؟؟؟و ايه المعايير اللى هتتحط لأستخدام النظام و امتى استخدمه .

نظام و سياسة الأمن و السلامة اللى هستعملها فى مشروعى لحماية الناس دول عشان ميحصلش حوادث و مشاكل لا قدر الله .

كل اللى انت شفته دا كمدير لازم تبقى عامله خطة من الأول و كل دا بنسميه Staffing Management Plan

نرجع نتكلم عن نظام المكافأت فى المشروع او زى ما بيتسمى Rewards system

لازم و انت بتحدد ايه المكافاة اللى هتقدر تقدمها لفريقك لما يحقق أداء عالى مثلا او عمل شىء كويس فى المشروع انك تبص لكل مجموعة أو حتى كل فرد لوحده …يعنى المهم مش تحدد اشياء عامة للكل لأن ببساطة مش هتبقى الهدية مناسبة للكل .

يعنى مثلا متعملش هدية عبارة عن “القران الكريم ” فى حين ان معاك فى فريقك ناس غير مسلمين . ممكن تكون مجرد كلمة ” شكرا و شهادة تقدير ” مكافاة كبيرة لشخص …ممكن يكون بونص كفلوس …حفلة تكريم لشخص ..تعرفو ان ممكن يكون نقلك لشخص من مكان لمكان هو بيحب يشتغل فيه فى حد ذاته مكافأة له ..ممكن مكتب مخصص لشخص يكون احلى مكافاة له و هكذا …

دورك و مهمتك صعبة لو حظك جه فى مشروع افراد فريقك اللى فيه من دول مختلفة او ثقافات مختلفة …لو معرفتش تدير الناس دى صح و تعمل منهم فريق صح …هتضيع يا وديع .

عاوز بس اتكلم عن مصطلحين مهمين شوية …

Virtual Team

و زى ما شرحت قبل كدا …دا معناه انك شغال مع فريق مش بتقابله Face to face
او بتتعامل معاهم و بتشتغل معاهم عن طريق الايميل او ال V- Conference
و كدا يعنى و دا بيوفر لك الفريق اللى بتحلم بيه و بتكلفة أقل .

تانى مصطلح هو ال

Co-location

دا معناه بقى انك بتحاول تخلى فريقك شغال فى مكان واحد … يعنى ميبقاش مهندسين الموقع مثلا بتوع مدنى كل واحد محطوط فى كارفان مع مهندس كهرباء !! لا جمعهم كلهم فى كارفان واحد او كل مهندسين الموقع مثلا فى مكان واحد .

Co- location = Communication

كل ما الفريق اتجمع … الاتصال بينهم هيكون اسهل و بالتالى المشاكل تقل و هيبقو كلهم على صفحة واحدة .
هنييجى بقى لعملية تطوير فريقك او Develop the team

دلوقتى انت معاك فريقك و لازم تبقى مركز على انهم يبقو فريق واثق من نفسه و مفيش اى خلافات بينهم و خاضعين لعملية تحفيز مستمرة عشان يحققو أداء عالى طول فترة المشروع .

دورك كمدير انك تعمل Team Building Activities

و دى بتقرب الفريق من بعضه و بتخليه يحس انه كيان واحد مش مفكك .
أمثلة بسيطة …

لما تخرج انت و فريقك تحتفلوا بمناسبة انتهاء بند معين … احتفالكم بعيد ميلاد شخص فى فريقك …تدريب مشترك ….لما تتقابلو بعد الشغل مثلا و تخرجو …تعرف ان مجرد اشراكك لفريق العمل فى تخطيط المشروع معاك دا يزود روح الفريق .
هنتكلم دلوقتى عن طرق ادارة الفريق …
لازم تفهم انك كمدير ازاى أو بايه تخلى فريقك يسمع كلامك …؟

اى مدير بيقولو ان عنده 5 قوى او 5 powers

1- formal power

يعنى قوتك بتستمدها من وضعك و منصبك القانونى كمدير ..فلما بتقول لحد اعمل كذا فتتصرف على اساس ان سلطتك عليه تخليه ينفذ اللى بتقوله .

2- Reward Power

و دى من اهم و أنجح القوى ذات التأثير … و دى بقى انك بتقول لفلان لو نفذت كذاهديك مكافأة كذا ” طبعا بتلاقيه طيااارة راح نفذ اللى بتقول عليه هههههه “
خلى بالك لما تييجى تستعمل الطريقة دى مع فريقك نصيحة …اوععععى توعد حد بحاجة و متديهالوش لأن دا ممكن يدمر فريقك و يفقدهم الثقة فيك تماما بعد كدا .

3- penalty power “ punishment power “

و دى من أسؤأ القوى اللى ممكن تستخدمها كمدير و طبعا من معناها عرفنا انك بتطلب حاجة تتنفذ بالترهيب او العقاب ” لو معملتش كذا هعمل فيك كذا ” و فى علم الادارة بيقولو ياريت متستخدمش النوع دا و لو اضطرتك الظروف لاستخدامه مع حد ياريت يبقى بينك و بينه ” يعنى مش تسيح لأمه وسط زمايله ” لأن دا ممكن ييجى بتأثير سلبى على فريقك و بالتالى مشروعك .

4 – Referent power

قوتك بالتبعية …زى لما تروح لحد تقوله المدير بيقوللك اعمل كذا ..هو بينفذ اللى بتقوله عشان تبعيتك للمدير او انت كلامك هو كلام المدير …

5-Experience power

من أفضل و اهم الطرق طبعا و معناها انك فريقك بيثق فيك و بينفذ اوامرك و دا بسبب خبرتك … لما فريقك يبقى عارف انك خبرة 20 سنة و تييجى تقول حاجة لحد ينفذها …فهو بيطيعك و لسان حاله ” يا عم اللىيقول عليه الراجل دا احنا نمشى وراه… دا 20 سنة خبرة يا عم انت و هو مش معقول يغلط !” .

الموضوع يطول شوية فى ادارة الموارد البشرية … فلو وجعت لكم دماغكم و عاوزين نقفل خلاص الجزئية دى قولولى و نشوف اللى بعده لأن اعتقد دا محتاج جزء كمان …

ادارة المشروعات والمدير الناجح (4)
م : محمد فريد بركات

 السابق : ادارة هدف المشروع

 التالي : ادارة الموارد البشرية

Tags:

You may also like...

0 thoughts on “ادارة الموارد البشرية”

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *