ادارة الجودة

 ادارة الجودة
Quality management

 

لما حد يتكلم قدامك عن ادارة الجودة …لازم تفهم اصلا يعنى ايه منتج ذو جودة ..أو انك كمدير تبقى عارف يعنى ايه تخلص مشروعك و تنهى أهدافه ” سواء تصنيع منتج أو بناء منشأ أو برنامج كمبيوتر ذو جودة “

اعرف المعادلة دى

Quality = customer satisfaction + conformance to requirements + fitness for use

الجودة = رضاء العميل + مطابقة للمتطلبات + الملائمة للاستخدام

يعنى لما يبقى فى منتج ملائم للاستخدام و مطابق لمتطلبات العميل و بالتالى يحظى برضاء العميل …اذن دا منتج ذو جودة .و انت حققت الجودة

مثال حلو كدا عشان نفهم أكتر ….لو سألت شخص يا ترى نوكيل 3310 جودته أعلى و لا جالاكسى 4 …؟؟؟!

الأجابة ان بالنسبة لراجل كبير مش يهمه فى الموبايل غير انه يتصل و يستقبل مكالمات و بطارية عملاها كبير و صوت عالى يبقى 3310 جودته اعلى …”بالنسبة للشخص دا ” لكن بالنسبة لك انت عاوز اغانى و فيديو و بتاع يبقى الجالاكسى وش طبعا .

و لكن فى حقيقة الأمر بقى اللى لازم تعرفه انك مينفعش اصلا تقارن جودة دا بدا …يعنى متقارنش عربية فيات ب مرسيدس و دا لأن الفيات من “فئة ” و المرسيدس من ” فئة ” أخرى .

بصفتك السيد المدير الناجح …. لازم تهتم بعمل خطة جودة …تشوف و تناقش و يمكن كمان تبص لمشاريع شبيهة لمشروعك او مشاريع قديمة انت عملتها عشان تعرف ايه المعايير و الحدود و سياسة الجودة اللى هتطبقها فى مشروعك لضمان الجودة …

يعنى مثلا فى خطة الجودة تبعك هتعمل

Check list

تقول لمهندسينك لما تييجى تستلم أعمدة هتبص على كذا و كذا و كذا و كذا و بالترتيب كدا .. دى جزء من خطة الجودة .

خطة الجودة بتوضح لفريقك ايه هى حدودك و سماحياتك لتطبيق الجودة …يعنى لما تقول فى كل 1000 علبة لو طلع 10 علب مش مظبوطين مش مشكلة لكن لو 11 يبقى وقف الانتاج و شوف الغلط و دى بنسميها
Tolerance

لازم تفهم عمليتين مهمين جدا فى ادارة الجودة و بدونهم يبقى اكيد مش هتلاقى جودة فى مشروعك

1- Q.A “ Quality Assurance “
2- Q.C “Quality Control “

Q.A

و دى معناها توكيد الجودة … العملية دى بتتم عادة فى مرحلة التنفيذ للمشروع …بيخرج فريق من عندك أو جاى من برة المشروع ..يقوم بعملية تأكد من تطبيق فريق المشروع لسياسة الجودة المخطط لها و الموضوعة بالمشروع .
Q.A = for the process “not the product”

أوعو تتلخبطو …دول مش بيشوفو المنتج ..لا دول بيتأكدو من تطبيق اسلوب و خطة الجودة ..

أمال مين اللى بيفتشو عن جودة المنتج و مطابقته للمعايير و صلاحيته و كدا

دا بقى بيحصل فى عملية التحكم فى الجودة او Q.C “ Quality Control 

دى بتقوم بعمل ما يسمى ب
Inspection
للمنتج …حد يقولى يعنى لو فى مشروع انشائى ..يبقى ايه المنتج يعنى ؟؟؟ المنتج هو الاعمدة …القواعد..السقف ..كدا

 

ملحوظة :

عندما نقوم بالتأكد من جودة عمليات المشروع أى ال
Quality assurance
بنقوم بعمل تفتيش زى ما قلنا يسمى
Quality Audit

و لكن عندما نقوم بالتحكم فى الجودة للمنتج اى ال
Quality Control

نقوم بعمل فحص يسمى
Inspection

طبعا انت لما بتلاقى خطأ فى مرحله معا  أو منتج …بتشوف سبب الغلط ايه و تحاول تصلحه و تعمل تحديث لمعلوماتك او لمعايير جودتك عشان ميتكررش تانى الموضوع دا و دا مفيد جدا للمشروع و لمشاريعك اللى بعد كدا فى المستقبل .

JIT – Kaizen

دول مصطلحين فى ادارة الجودة …
JIT “ JUST IN TIME”
معناها هو عدم الحاجة لتخزين المواد و ضمان وصولها فى وقت الاستخدام لها بالظبطبدون اى تأخير أو بدون حدوث خطا فى ادارة الجودة .

أغلبنا شاف الفيديو بتاع الفندق اللى فى الصين و بنوه فى 48 ساعة تقريبا … استخدموا الاسلوب دا …كل حاجة بتييجى فى وقتها و بتتركب …طبعا لولا تطبيقهم لخطة جودة ممتازة …كان حصل خطأ فى جودة منتج أو عملية و بالتالى تم اعادة الشغل و طبعا الكمية اللى جاية مفيش فيها زيادة او نقص … يعنى لو جايلك طن اسمنت تعمل بيهم حاجة و حصل غلط …هتجيب اسمنت تانى منين تعيد بيهم شغلك مثلا يعنى و انت اصلا اللى جايلك بالظبط على القد ..” دا بيبن لك قد ايه هو خططو و نفذو ادارة جودة بجد “

Kaizen

دى فلسفة يابانية …الكلمة اصلا يابانية و معناها
Improvement

و الفلسفة دى قايمة على ضرورة التحسين المستمر للجودة … يعنى متقولش انا كدا وصلت و خلاص مش هدور على تحسين للجودة او هتعب نفسى و احاول أدور على تحسين لبعض عمليات الأنتاج اللى هتحسن الجودة .

لا الناس دول مؤمنيين بمبدأ
Continious Improvement

التحسين المستمر للجودة .

نسيت أقوللك حاجة مهمة أوى … و انت بتخطط للجودة و معاييرها و اسسها و اسلوب تحقيق جودة مشروعك …عاوزك تبص على حاجة مهمة أوى
Cost of quality

بيقوللك مصنع صابون … و جه المديرلأنهم بلغوه ان فى مشكلة فى الجودة … المشكلة ان فى ساعات فىخط الانتاج ..بتخرج علبة الصابونة فاضية … يعنى مجرد ورقة صابونة و مقفولة لكن مفيش جواها الصابونة …

جرى المدير و اتفق على اجهزة من برة و مش عارف ايه و نظام الكترونى ايه و ليزر و بتاع و تكلفة عالية جدااااااااا

جالهم عامل من عمال خط الانتاج و قالهم انا عندى حل تانى …هنجيب مروحة و نحطها قدام الصابون و هو معدى على السير …لو الصابونة موجودة جوا الورقة …مش هتطير الورقة …لكن لو العلبة فاضية …الهواء هيوقعها من على السير ة بالتالى العميل مش هيلاقى علب صابون من غير صابون .

شوفو الفرق بين تكلفة الجودة هنا و هنا … اجهزة و ليزر …و مروحة ب 200 جنيه .

لازم تحسبها كويس …تعرف تنفيذك للجودة هيكلمك كام و يا ترى دا يستاهل و لا لا …متكونش الارباح من المشروع مليون و تيجيلى انت تعملى جودة تتكلف 2 مليون .

فى النهاية نختم موضوع ادارة الجودة بجملة شهيرة جدا عن الجودة .

Quality is planned ….Not Inspected… and prevention over inspection .

معناها ان المدير الناجح هو اللى يخطط للجودة مش مجرد معناها عنده هى انه يشوف المنتج ” بعد ما يخلص و يتعمل و يصرف عليه وقت و مجهود ” مجرد يشوفه صالح و لا غير صالح ..مش هى دى الجودة …و انك “تمنع ” حدوث عيب فى المنتج أحسن من انك مجرد ” تفتش عليه ” أو تشوفه بعد ما يتعمل فيه عيب او لا

الوقاية خير من العلاج

يا ترى لو انت مدير و متعرفش اصلا يعنى ايه جودة و يعنى ايه توكيد جودة او تحكم فى جودة او جالك المالك و قالك مرة يا ترى بتعملوا
Quality audit

و حضرتك اصلا مش فاهم هو بيقول ايه و قلت له ” لا الحقيقة انا وحيد ابويا و امى ” هيبقى منظرك ايه ؟؟؟

 

ادارة المشروعات و المدير الناجح (2)
 م : محمد فريد بركات

السابق:  اداره المشوعات والمدير الناجح

التالي: ادارة هدف المشروع  

Tags:

You may also like...

0 thoughts on “ادارة الجودة”

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *